Улаанбаатар /МОНЦАМЭ/. Үндэсний 34 дэх удаагийн номын баярын “Автобустай аялал” хөтөлбөрт энэ удаад Нийслэлийн 8 дүүргийн таван сургуулийн 225 сурагч хамрагджээ.

Энэ удаагийн номын баяраар сурагчдыг “Автобустай аялал”-аар номын баярт хүргэж ирж оролцуулсан юм. “Автобустай аялал” хөтөлбөрийг хотын төвөөс хол, алслагдсан сургуулийн сурагчдыг авчирч номын баярыг таниулах зорилгоор зохион байгуулдаг уламжлалтай. 

Автобустай аялал хөтөлбөрийг зохион байгуулж буй “Номын ертөнц” клубийн гишүүн Н.Марал ярихдаа, “Энэ хөтөлбөрт маань Нийслэлийн Налайх дүүргийн 88 дугаар сургууль, Хан-Уул дүүргийн 118 дугаар сургууль, Сонгино-Хайрхан дүүргийн 112 дугаар сургууль, Чингэлтэй дүүргийн 72 дугаар сургууль, Сүхбаатар дүүргийн 58 дугаар сургуулиас гэхчлэн нэг сургуулиас 45, нийт 225 сурагч хамрагдлаа. Эдгээр хүүхэд  Номын баярын үйл ажиллагаатай танилцаж, нээлтэд оролцсон.  Ном унших дуртай, номд хайртай, мөн Номын баярт оролцохыг чин сэтгэлээсээ хүсдэг хүүхдүүдийг “Автобустай аялал” хөтөлбөрт сонгодог. Ковидын үед түр завсарлаад байсан энэхүү хөтөлбөрийг 2022 оноос дахин хэрэгжүүлж байна" гэлээ. 

Аялалд оролцогч 118 дугаар сургуулийн 10в ангийн сурагч Б.Золзаяа: Анх удаа автобустай аялал хөтөлбөрт хамрагдаж байна. Жил бүр номын баярыг үзэж сонирхон, дуртай номоо авахыг хүсдэг ч ирж чаддаггүй. Өнөөдөр энэ баяр дээр ирээд үнэхээр гоё байна. Авахыг хүссэн номнууд олон байгаа хэдий ч мөнгө байхгүй. Энэ аяллыг зохион байгуулж, бидний нэг өдрийг хөгжилтэй, дурсамжтай болгож буй ах эгч нартаа баярлалаа.  

Сурагч М.Намуун: Аялалд оролцон, найзуудтайгаа хамт автобусаар ирэхэд хөгжилтэй, бас дурсамжтай байна. Өнгөрсөн жил ээж аавтайгаа ирж байсан. Энэ удаагийн номын баярын нээлт үнэхээр сонирхолтой, өвөрмөц санагдлаа. Би багаасаа ном их уншдаг хүүхэд байсан. Өнөөдөр “Тунгалаг тамир” романыг авахаар зорьж ирээд байна. 

Түүнчлэн энэ удаагийн номын баяраар “Өсвөр насныханд санал болгох 50 номын жагсаалт”-ыг танилцуулсан юм.

Р.Цэцэгбаяр

Т.Амаржаргал