Сайн байцгаана уу? "Номын ертөнц" клубийн ахлагч Г.Тэн-Мэргэн байна. Манай клуб нь номын баярын зохион байгуулалтыг хариуцан ажилладаг билээ. Бид намрын номын баяраа зохион байгуулах бэлтгэлдээ орсон бөгөөд энэ ажлын нэг хэсэг болох хүсэлтэй хэн бүхэнд нээлттэй юм.
Бидэнтэй хамтран ажиллаж, баярын нэг хэсэг болох хүсэлтэй бол клубийн гишүүн эсвэл сайн дурын ажилтнаар нэгдээрэй.
Бүртгүүлэх бол энд дарна уу: https://forms.office.com/r/FhnP6zzLD1
Одоо бидэнд ирсэн номын баярын тухай болон хүүхдүүдийн захидлаас хүргэе.
- Номын баярт оролцох нь миний хувьд зүгээр нэг үйл явдал биш, харин өөрийгөө хөгжүүлэх, шинэ ертөнц нээх боломж гэж хардаг. Би ном уншихдаа үргэлж шинэ санаа, өөр өнцөг олж хардаг бөгөөд тэр мэдрэмжийг бусадтай хуваалцахыг хүсдэг. Энэ баярт оролцсоноор зөвхөн дуртай зохиолчдоо биш, ном сонирхогч залуустай уулзаж, шинэ найз нөхөдтэй болох, туршлага солилцох боломж гарна гэж итгэдэг. Мөн номын үнэт зүйлсийг бусдад түгээж, унших соёлыг дэмжих нь миний жижигхэн хувь нэмэр болно гэж бодож байна.
- Энэ арга хэмжээнд оролцсоноор өөртөө маш том өөрчлөлт хийнэ гэж бодож байгаа. Учир нь шинэ хүмүүстэй танилцаж, биеэ дааж, олонтой харилцаж, өөртэйгөө адилхан сонирхолтой хүмүүс хүүхдүүдтэй танилцах байх. Хамгийн чухал нь миний мөрөөдөл болох York St John University-д ороход маш их тус, нөлөө үзүүлж өөрийгөө улам илүү танихад тус болж байгаа юм. Энэ үйл ажиллагааны нэг хэсэг болж өөрийнхөө үеийн болон дүү хүүхдүүдэд ном унших ямар гоё гэдгийг ойлгуулж, ном уншдаг хүн ямар цэгцтэй, зөв ярьдаг гэдгийг харуулахыг үнэхээр их хүсэж байна.
- Номын баярт яагаад оролцож өөрийн хувь нэмрээ оруулах хүсэлтэй байгаа нь энэхүү баяр бол өсвөр насны минь үнэ цэнтэй дурсамж. Намрын номын баяраар анх сайн дураар ажиллаж байхдаа номын баяр бол зүгээр ч нэг хэдэн цагийн ажил биш юм байна даа ард нь маш олон хүний хэдэн сар жилийн хөдөлмөр явж байдаг гэдгийг ойлгож авсан. Мөн клубийн үйл ажиллагаанууд ч чамгүй их хөдөлмөрийн үр дүнд босдог зүйл. Мөн номын баяр нь нийгэмд авч ирж буй хамгийн чухал эерэг өөрчлөлт юм. Тийм ч учраас багш нартайгаа клубийн найз нартайгаа хамтдаа номыг сонирхогч хэн бүхэнд номын баярын үнэ цэн болон номын үнэ цэнийг ч бас түгээн ажиллахыг чин сэтгэлээсээ хүсэж байна.
- Би жил болгоны номын баяраар шинэ зүйл сурч, мэдэж авдаг. Ажиллаж байсан 5 удаанаас маш их туршлага хуримтлуулсан. Жишээ нь өмнөх номын баяраар гэхэд олон хүмүүстэй харилцаж, Монгол болон гадаадын иргэдээс судалгаа авч, мөн Гадаад хүмүүстэй ярилцаж номын баяраа сурталчлахдаа хүмүүстэй яаж харилцаж, ярилцан дулаан яриа өрнүүлэхийг суралцаж, гадаад хэлнүүдээрээ ч ярихдаа сайжирсан. Мөн асар дээр сэтгүүл тарааж дугуйтай хүн оруулахгүй харах зуураа хүмүүсийн дургүйцэлтэй тулгарсан ч яаж шийдэхийг сурсан. Номын баяр бүр надад шинэ сургамж, хичээл заадаг, мөн найзуудтайгаа ажиллаж, гоё дурсамж бүтээдэг болохоор би жил болгоны номын баярт оролцохдоо дуртай байдаг.
- Би энэ арга хэмжээнд оролцохыг хүссэн шалтгаан маань ном, уншлагын соёлыг түгээн дэлгэрүүлэхэд өөрийн хувь нэмрээ оруулах хүсэлтэй холбоотой. Номын баяр бол мэдлэгийн үнэ цэнийг түгээх, унших сонирхлыг нэмэгдүүлэх, шинэ үеийн залууст эерэг үлгэр дуурайлал үзүүлэх чухал арга хэмжээ гэж боддог. Би өөрөө ном унших дуртай, мөн олон хүмүүст урам зориг өгч, шинэ мэдлэг олж авахад туслахыг хүсдэг. Энэ баярт оролцсоноор бусдаас суралцаж, өөрийн туршлагаа хуваалцаж, хамтдаа хөгжих сайхан боломж гэж харж байна.
